قميص شرقي

أنا معرفتش
أضم دراعي على صدري
و اقفّل كل باب أو شرخ في كفوفي
و من خوفي...
فتحت قميصي لعيونهم
و اتمليت بالناس

آه
و احب الناس
و احب البيت على البيت يبات مسنود
و احب الشارع
رافع ..كفه للضلمة بضي عمود
و احب القهوة و المترو
و احب المشي عالكورنيش
و احب النيل و لو مرضيش
يشرّبني و قالي مفيش
و احب بنات شبابيكي
و اقول بالعامي و الفصحى
" باموت فيكي "
يا سهرانة كما قمرات بيتغنوا
و احب الشعر
و خصوصا صراخ دنقل
كلام درويش
و احب منير.. غناه
" قلب الوطن مجروح , و حدوتة "
و احب سجايري " كلوباترا "
و ادلعها و اقول " كوبا "
عشان كوبا و أدب كوبا
و أحب بلدنا
آه يا بلد
و منهوبة و منكوبة
...
و أحب الناس
شوارعهم دي مفتوحة على قلبي
و اعدّي.. في صباح الخير
و أقول خبّي
يا واد خبّي
عن الصاحب ليفتكرك بتحتاجه
عن البنت الصافية لتعكر فساتينها
عن الشيخ -اللي شبه جدي -
لتفرط سِبحته عيونك
يا واد خبّي عن الدنيا
أكيد في السر بتخونك
و تعشقها
..
و احبك
لوني من لونك
و حزنك ده أكيد حزني
و باحتاجك
و اقول .. فينك
و آه لو ..
وآه لو ..
و آه لو..
فيندهني سراب في مسافة الغربة
يقولي .. " لو "
فَتحِت دروب شياطينك
و لا جابت و لا ودت
فضلت تحب .. كل الناس
و هما فين.. محبينك

..
_____
________




خالد عبد القادر

فيه أعمال مينفعش بعدها غير إنك تقول الله وتقعد ساكت  من بره بس