Friday 26 September 2008

نافذة شرقية


أن ننتشي بالحب لوهلة لبرهة لفترة.. ثم ينطفيء.. ثم يذوى.
ثم في يوم ما تعود الذكرى محملة بألم الفقد.
ترى أيزيد الألم بطول الفرح؟
إذًا أيهما أفضل.. أن تمر حياتنا بدون فرح كبير ولا حزن عميق
.. أم نفتح صدورنا للزهور والرصاص؟
تقبلت منذ زمن بعيد أنه لا فرح يستمر. وكان عدل ذلك أن لا حزن يبقى.
لكن النفس تشتهي الفرح.
تغافل صاحبها وتنساق لموارد الهلاك
نفسي الخائنة تخونني معك
تنتظرني كل ليلة حتى أكون في أضعف حالاتي فتأتي بكِ.
تنشرك قنديلا أمامي، ودفء ضوئك يمني النفس بالقبض على شعاعك.
آه من تلك الأحلام! دائما على بعد قبضة منك، أو في قبضتك
.. تقبض على الوهم

Monday 22 September 2008

كدت أن أنتهي



الانشغال أنواع. انشغال ممتع وانشغال مقلق. وانشغال.. مجرد انشغال. اليومين اللي فاتو كنت بمر بالنوع ده. عارف إنها مجرد فترة وهتعدي. حتى ممكن أكون تقريبا عارف الوقت اللي تكون انتهت فيه. في الوقت ده بكون عامل استناد باي لنفسي - نفسي الحقيقية – لحد ما الأوضاع تستقر، لكن لأني برضك مش زي الأجهزة بالظبط فبحلم
كتب كتير وناس كتير اتكلمو في موضوع الأحلام والرؤى، لكني بعتبر نفسي شخصية مش شفافة. مجرد انفعالات بتتكتم لفترة من الزمن؛ بيحررها الحلم. عشان كده بعرف غالبا افسر أحلامي بسهولة.. برضك مش دايما بتكون أحلامي انفعالات، أو بالبساطة دي. ودي بتكون الأحلام الملهمة
حلمت أني ماشي في الشارع لقيت واحد.. كنت عارفه في الحلم بس مش في الحقيقة. كان طالع من عند واحد بيبيع مجلات وجرايد في الشارع. لقيت معاه مجلات وكتب كنت بحب أقراها زمان. قلت له فرجني. فرفض. رحت للراجل وقعدت.. كان فيه حاجة زي تربيزة. وكل ما أقلب في الاستناد الآقي كتب ومجلات للناس اللي بحبهم وأغلبها حاجات جديدة هما نفسهم مكتبهواش. يعني مثلا كان فيه قصة جديدة لكامل كيلاني –الله يرحمه
بعد رمضان إن شاء الله أرجع للقراية وأشوف إذا كان الأستاذ كامل نزل حاجة أثناء انشغالي ولا لأ
رمضان السنة دي كان مختلف تماما بالنسبة لي من ناحية الوقت.. لأول مرة من حوالي 3سنين تبقى الأيام عندي ماشي بشكل تكراري.. يعني زي الناس الطبيعية كده. بس الوقت كان ومازال مضغوط بشكل رهيب. وده اللي منعني من الكتابة خلال رمضان، بالرغم من إن فيه موضوعات كتير في ذهني.. على العموم إن شاء الله فيه متسع بعد العيد

كلمة أخيرة من نفسي.. حاولو تفطرو وأنتو مشغلين إذاعة القرآن الكريم.. بعد الفطار بشوية فيه برنامج اسمه"حقائق وشبهات" البرنامج بيجي من سنين وبيستمر طول السنة. بس في رمضان بيستضيف د:محمد عمارة. البرنامج تحفة. مقدرش أقول كل سنة أحسن من اللي قبلها لأنه كل سنة بيتكلم عن موضوع مختلف كل واحد فيهم أهم من التاني