رضوى داود
من موقف عبد المنعم رياض
وبعد الاطلاع على الرسالة وعلى ردود أفعال القراء كان هذا هو ردي:
1- بإمكانك دائما أن تشتري "ام بي ثري" وتضعيه على أذنيك لتلافي هذا التلوث السمعي - جربت هذا الإسلوب بنفسي وأعطى نتائج فعالة
2- بإمكانك أيضا ركوب ميكروباص تاني – لو عندك وقت، وهذا الحل غير مضمون فالربما كانوا يشغلون العنب أو البلح أو البطيخ في التاني.
أما عن تعليقي عن مجريات الأحداث فهذا موضوع شرحه يطول أوجزه في التالي:
الناس دي كانت ناس مبسوطة، وفي هذه الحالة من الانبساط يجوز أن تحدث أشياء مخالفة للحياة الطبيعية، ففي الأفلام العربي الأبيض والأسود عندما كان عسكري الدرك – اللي على أصله – يوقف أحدهم بتهمة السكر والعربدة؛ كنت تجد دائما الصديق الذي يرد " معلش يا حضـ صول أصله مبسوط شوية " ويكمل بطل الفيلم " أيوه أنا مبسوط شوية " ويستمر في الغناء بصوت أجش.
ويتفرع من هذه النقطة نقطة فرعية وهي:
هما مبسوطين ليه؟
ومن الواضح أننا لو استطعنا الوصول لسر هذا الانبساط سنكون وصلنا لسر أهم من سر تفوق اليابان عننا، بالرغم من أنهم في الوقت الذي خرجوا من الحرب العالمية الثانية مدمرين كنا بلد محترم، والقاهرة كانت من أجمل عواصم العالم وقتها.
فكون هؤلاء الشباب يركبون الميكروباص، فهذا يشير بوضوح إلى انتمائهم الطبقي، فكونهم "مبسوطين شوية" لا تفسير له سوى أنهم ضامنين وظائف ثابتة بمرتبات مقبولة توفر لهم معيشة كريمة، وأن كلهم أمل في مستقبل باهر مشرق سيصلون إليه بالعزيمة و الكفاح والإخلاص.
فإذا لم يكن الحال كذلك " فمعلش يا حضـ صول"
أما عن كلمات الأغنية نفسها فلا أجد فيها أي مخالفة لأي قانون
طب اسمعي دي:
ارخي الستارة اللي في ريحنا
لحسن جيرانك تجرحنا
يا مفرفشين يا مزئطاطين
بالقوي يا أحنا
وهي كانت واحدة من أهم الـ"هيتس" في عصرها السعيد الذي بعد ثورة 1919
أي في ذروة الاحساس باليأس من رحيل الاحتلال الإنجليزي وأن الإنجليز هم قدرنا. تخيل لما دولة عظمى لا تغيب عنها الشمس تحتلك أنت يا حشرة.
فين الأمل؟
يعني لما تكون مهزوم ومحبط تعمل إيه؟
لما يكون عندك يقين إن مافيش حاجة هتتصلح وإن بكرة أسوأ من النهاردة.
شايف البلد بتتباع قدامك حتة حتة. وبطون معينة بتتنفخ و الكل بيتكلم. خليهم يتكلموا. حرية الكلام مكفولة، لكن حرية الفعل لأ.
أوع تقل عقلك وتفكر في التغيير. آه اللي فكروا قبلك أهم بقوا عبرة وعظة. لا أمريكان هينفعوك ولا كرسي برلمان ينفعك ساعتها. القضايا جاهزة والتلفيقات على قفا مين يشيل.
أما المستقبل فباهر زاهر زاخر. يعني بدل ما الصحفيين وبتوع حبوب الإنسان يقعدوا يوجعوا دماغنا ويكرروا نفسهم كل شوية، وقانون الطواريء ونزاهة الانتخابات والكلام الفاضي ده.بنقولهم خلاص قديمة، زهقنا منها، شوفولك لعبة تانية يا بابا منك له لها.
خلاص الموضوع بقه دستوري.
فمتضحكش على نفسك وتقوللي كفاية وجبهة معرفش إيه. أنتوا أقلية مريضة. ولو وقفتوا بره المجلس ولبستوا شارات الحداد تبقوا عايزين تفرضوا رأيكوا على الأغلبية جوه اللي مركبة إيديها في حبال عشان يعرفوا يناموا وإيديهم مرفوعة
موافقة..موافقة..موافقة
يبقى تفوق ليه؟
وتنكد على نفسك ليه؟
أرخي الستارة اللي في ريحنا
لحسن جيرانك تجرحنا
تعال لي يا بطة
هأقولك عصيدة
عصيدة بشعرية
البوس البوس
الحضن الحضن
مشتاق مشتاق
حلو يا حلو
ول يا ول
من طرف أخوكم اللمبي
No comments:
Post a Comment