تعاطفا مع عز

أنا مبشتغلش في حديد عز..
لكن فيه كلمة حق لازم تتقال. أنتو متضايقين من الراجل ليه؟
من إحدى وجهات النظر فالراجل معملش أكتر من إنه أنتج منتج ما. المنتج ده فيه غيره في السوق المحلي بينتجه. والشركات في العالم بتنتجه بسعر ممكن يكون أغلى منه.. وبين البايع والشاري.. يفتح الله.
قعدنا نقول احتكار احتكار لحد ما شفنا الاحتكار اللي على أصله مع ممدوح إسماعيل، الراجل كان محتكر البحر الأحمر، على الأقل محدش مات بسبب جودة حديد عز.
هيقول البعض إنه موصلش لشركة الدخيلة إلا بالفساد والإفساد.. طب ما أحنا كلنا عارفين القطاع العام اتباع وبيتباع إزاي.. وليست شركة المراجل منا ببعيد، الناس نشرو في الجرايد تفاصيل تفاصيل عملية إفشال الشركة وتحميلها مديونيات بالعافية عشان يتقال شركة خاسرة وتتباع.. حد اتحرك؟وشفنا شغل لجان تقييم الأراضي حطت أسعار كام فيها-للي ميعرفش القصة السعر المقترح أقل بكتير من تمن سعر أرض الشركة اللي على النيل مباشرة- وفي غيرها لحد ميدان التحرير
هيقول البعض الآخر إنه كان لا مؤخذة درامر(طبال افرنجي يعني) وبعدين بقى ملياردير(يعني مليونير مضروب في ألف)ومش عارف الصراحة إيه الغريب في كده؟ يعني لازم كل واحد ملياردير يكون أبوه ملياردير زيه أو على الأقل مليونير، وجده كذلك.. طب ما هو بالتأكيد-بلاش بالتأكيد خليها غالبا-واحد من أجداده كان فاسد مفسد، إيه العيب إنه هو اللي يفتتح تاريخ العيلة، مش هو ده برضك تشجيع الشباب؟!!ه
برضك هيجي البعض يعيد ويزيد في موضوع لجنة السياسات ويخبط في الحلل العليا. يا ناس حرام عليكم ده حتى ألطف كتير من قوانين شهاب، وبعدين موضوع لجنة السياسات ده بالذات واقف عليه بخسارة.. تقولولي إزاي؟ أقولكم
في كل نظام ديكتاتوري في العالم لابد من وجود واجهات ومنفذين.. الكلام ده مش بس في الدول ده في أي نظام فاسد.. الواجهة بتستحمل كتير من دعا الناس ليل نهار إن ربنا يخرب بيتهم ويكب زيتهم وييتم عيالهم، وبالتأكيد لازم ياخدو اتعاب إنهم يكونو اسفنجة لغضب الجماهير، اللي هيا مبتفكرش ولو للحظة واحدة.. طب مين اللي وصله للمكان الحساس ده وحطه فيه؟!!!!!!!!!!!.. بكره محاولات الاستخفاف بعقول البشر-أو حتى الثدييات العليا- إنه:أصله مش عارف- يبقى أهبل. أو:اللي قاعدين حوليه- يبقى اختياره أهبل، أو:بطانة السوء- يبقو مستهبلينه.. والحمد لله الفضائيات مخلتش. وصلة دش بعشرين جنيه والحاكم يشوف رأي الجماهير فيه وفي رجالته بالصوت والصورة. طبعا هو مش هيخاف من بتوع المصنفات إنهم يقطعو الوصلة، لكن عشان ما يتقطعش عليه الماتش ممكن يجيب دش بالريسيفير بالتقسيط برضك بعشرين جنيه في الشهر، أو يعمل جمعية

أحيانا لما بفكر في اللي ورا الستار بترعب. كأي مواطن عربي أؤمن إيمانا قاطعا إنه لازم فيه حاجة بتتم من ورانا، والسرقة اللي بتحصل من قدامنا بتتعمل عشان تداري على عملية أكبر-زي تجارة المخدرات كده- بترعب من كمية الفلوس اللي بتتسرق-بلاش الواحد يودي نفسه في داهية-كمية الفلوس اللي بتتحول من رصيد لرصيد. لما الواحد يسمع طراطيش كلام-هيا مش طراطيش ولا حاجة هي اتهامات موثقة بتتكب في الجرايد الحكومية و التقارير الحكومية ويناقش بعضها تحت قبة البرطمان بالضبط قبل ما يتحولو لجدول الأعمال- عن أراضي بالكيلومتر في سينا والبحر الأحمر وكل منطقة ممكن يكون ليها مستقبل بتتباع بتراب الفلوس. عن الصفقات الغير مشبوهة لبيع القطاع العام برضك بتراب الفلوس- طبعا هيا غير مشبوهة لأننا متأكدين إننا مسروقين فمفيش شبهة - وفي النهاية واحد ظريف بيستخف دمه افتكر إننا زمان-في بداية قصة الخصخصة- كنا قلنا إننا هنبيع الشركات المتعثرة عشان نطور الغير متعثرة.جه الأخ خفيف الروح بيسأل الحكومة.. هو انتو صرفتو الفلوس فين؟
الأخ ناسي إننا بنكتر كل سنة كام مليون. وبما إن الحكومة قلبها حنين بتعطف ع الناس دي وتديهم مما أعطها الله- زكاة عن عافيتها- وأحنا دونن عن خلق الله بنحب ناكل الفلوس.. بالضبط كده زي ما الأرانب بتموت في الخس أحنا بنموت في طعم الفلوس. تلاقي الواد الصغير ماشي في سوق التلات ماسك في إيد أمه بإيد والتانية ماسك رزمة جنيهات وعمال ينهش، وطبعا كل ما بيكبر بياكل أكتر فميشبعش بعد كده إلا بالعشرات ثم العشرينات لحد ما يوصل للميات- ده طلعو ورقة جديدة بميتين جنيه عشان فجعنة الشعب- من غير ما يفكر في يوم من الأيام إنه يشتغل عشان يصرف على كيف الفلوس
تلاقيه طول النهار قاعد ع القهوة ماسك شيشة وبشرب فيروز تفاح وبيلعب طاولة، وآخر النهار يروح لماما مصر- مبارك، أو مصر- السلام. ويمد إيده.. وهي عشان قلبها أبيض تديه. فيقوم طالع على اقرب غرزة ويديها بانجو وحشيش طول الليل، وبالشكل ده ميعرفش يصحى بدري عشان ينضم لإخوانه الفواعلية اللي قاعدين طول النهار في ميادين العاصمة مستنين أي حد يحملهم بالعربية، ولا حتى يلحق إخوانه اللي طالعين على أول فلوكة لإيطاليا برضك عشان يقعدو في ميادينها أصلها هواية، أو حتى يلحق يقف في أي طابور من طوابير الالتحاق بالعمل ويدفع فلوس الاستمارة ويستنى المكالمة المستحيلة- بلاش تشاؤم خليها شبه المستحيلة- عشان ترد عليه البت الأمورة وتقوله قبلت يا ننوس بس عليك إنك تمضي على طلب استقالة مع توقعيك على عقد العمل، ومش هنختلف في المرتب أنت عارف العمل عبادة. طبعا الواد تحت تأثير إدمانه للفلوس يقبل بكل الأوضاع المهينة.. بس لما يجي آخر الشهر يحسبها يلاقي إنه يدوبك عايش واللي جاي على أد اللي رايح. بس برضك في شباب عترة – رجالتك لسه مامتوش يا مصر – بيعرفو يحوشو متعرفش إزاي. وبعد سنين تبتدي دماغ الواحد فيهم تلعب.. والشيطان يوسوس لهم. ويلعب على غرائزهم الحيوانية وشهواتهم الدنيئة ويسولهم إنهم.. إنهم.. إنهم يتجوزو – أنا مقدر دهشتكم بس والله بتحصل واعرف شباب بيفكرو التفكير ده- فيقوم عامل جمعيات ورا جمعيات وحسبة برمة تنبثق منها حسبة برمة عشان يكتشف إنه ممكن قبل سن اليأس يلحق شقة لقطة في طريق الواحات. يصحى تاني يوم يبص في جرنان اللي راكب جنبه الأتوبيس- عشان هو بيوفر – يلاقي خبر إن سعر الحديد زاد فيكون قدامه حل من اتنين
يا إما يتقبل الأمر الواقع ويصرف نظر عن الموضوع ده.. وبالشكل ده يكون حمى مستقبل البلد
أو ينتحر.. وبالشكل ده يكون حمى الحاضر والمستقبل

عشت لمصر يا زيزو