Sunday, 4 November 2007

عقارب في حياتي 1 - الورد جميل


كان قدري الشخصي أن تدخل العديد من العقارب في حياتي. أن أتعامل معها واستكشفها.. واكتشفت إنها على خلاف الكثير مما نتصور عنها.. وهذه بعض النماذج

(1)
الورد جميل - لذيذ
الورد

كما أن قدر الأزهار والعصافير والنسمات

أن تكون

أزهار



و
عصافير

و
نسمات

(معنديش صورة لدي
)

كان قدرها الشخصي أن تكون وردية

وردية النظارة والابتسامات

وردية الملابس والالتفتات

لم يكن باختيارها أن تولد بتلك الرقة

وردية حتى النخاع الوردي/ الشوكي سابقا

حتى تحتم عليها ذات يوم
أن تغير اسمها كي يتطابق معها

ومن هنا أتت روز التي نعرفها




آنسة روز


وإن  أشاع البعض عنها غير ذلك
ورسموها بشكل
مختلف

صورة لهدى كما تراها رضوى/ بو


ومن هنا أتت قرارتها التاريخية

قرار رئيسة الجمهورية بافتتاح كشك للياسمين
تكون مهمته إلتقاط الياسمين المتساقط منها أثناء ابتسامتها
أو النابت من أثار قدميها
أو المتساقط من شعرها خلال عملية تمشيطه/تفليته

قرار ثان بافتتاح جنة المجاذيب
وذلك لمعالجة الذين صرعوا من إحدى لفتاتها الجانبية
أو من آثار عطورها الفواحة/ أسنس شادية
وإن تواردت الأنباء باشتراك أحد الـ...لا مؤخذة
وتحويله للنشاط النقدي


وقبل أن تلقي بقرارها الثالث
تعامدت الشمس على برج الجوزاء فأنتجت حوتا لا بأس به على الإطلاق وإن شابه بعض القصور في الغدة القوسية مما استدعى تدخلا جراحيا عاجلا وتوالت النداءات
نحتاج إلى عقرب.. نحتاج إلى عقرب
وهكذا تغلبت مشاعرها النبيلة على أنانيتها الفردية وهكذا عرف الجمع المحتشد أنها من برج العقرب
لكنها لم تهتم بعد أن أتمت مهمتها على خير وجه

وهكذا رحلت على متن سفينتها الفضائية لتبتعد عن الكوكب الأرضي
لتترك الحسرة في قلوب خمسة عشرة نفسا على الأقل هم الديانة المعروفين حتى الآن

ولكن لم تكن تلك هي نهاية القصة
فقد أصلحت جهاز الكمبيوتر وعادت للحياة للأسف
كي تشارك العالم فرحته باحتفاله بعيد ميلادها الـ... مش فاكر كام

ولكن أؤكد لكم
إن رأيتموها لن تعطوها أكثر من

12
قول
13 سنة

ولكن صدقوني.. إن تعاملتم معها
فلن تعطوها أكثر من

3
قول
4سنين

ولكن فلتثقوا في كلامي.. إن طالت فترة التعامل

فربما عادت في بطن الست الحاجة
في سابقة تاريخية لم تحدث من قبل

ولكن لا تستغربوا فأنتم لا تتعاملوا شخصية عادية
أنتم تتعاملوا مع كائن فضائي بحق

كل سنة وانتي طيبة يا هدى
معلش جت متأخرة
شوية













Saturday, 27 October 2007

اكتئب يا عزيزي احسن لك

اضرار الضحك والابتسام

لم تثبت تجارب لم تجري في المدي البعيد . ان الضحك او حتي الابتسام لها عظيم الضرر علي صحة الانسان سواء كانت البدنية او النفسية او حتي وهذا الاهم الاجتماعية . ودوما كنا نسمع ان الضحك يحرك عضلتين فقط بعكس التقطيب والتكشيرة التي تحرك 13عضلة . فتخيل عزيزي مدي التنبلة والكسل لدي الحمقي المبتسمون فهم يحركون عضلتين فقط يا مؤمن . بعكس التكشيرة التي تبعث فيك النشاط والحيوية فقد حركت 13 عضلة يا راجل . فما الداعي للكسل ؟!.
ولم تمحي من الاذهان حادثة الماليزي( مهاتيري محمود) الذي ابتسم ونسي نفسه فأكلت عوامل التعرية والرطوبة اسنانه الامامية . وما زلنا في جنوب شرق اسيا مع المواطن الصيني (بس ــ طاوــ يسي ) ولا بد ان يكون الاسم الصيني مجزء علي ثلاث . فقد كان يتمتع هذا الصيني بغمازتين جميلتين وفي اثناء نوبة ابتسام ولحظه العاثر انغرزت ابرة نحلة داخل حفرة الغمازة مما اجبره علي اجراء عملية لأستأصال الغمازتين . ومن جنوب شرق اسيا نطير الي نادي الجولف الملكي في عاصمة الضباب لندن واثناء متابعته لمبارة (تايجر وود) كان المواطن الانجليزي (كراي ساد) (واخداه) الجلالة في نوبة ضحك و قهقه فأنحشرت داخل حلقه كرة جولف مما أضطره لاجراء عملية اللوز علي كبر .( فشالوا اللوز وسابوا الكورة)
وبالطبع لن ننسي سرد القصة الشهيرة للنجمة (رقية ابراهيم) بعد ما اكد الدكتور(محمد عبد الوهاب) (انه مش شايف غير صفين لولي) وأثناء حضورها لاحدى الحفلات مما حتم عليها توزيع ابتسامات المجاملة . أكتشفت في نهاية الحفلة اختفاء اسنانها و أنها اصبحت هتماء كسلحفاة . وقد قام البوليس في حينها بمجهود كبير واستطاع القبض علي اللص الغسيل الشهير (ابراهيم الفسل) ولكن بعد ان باع كل الاسنان ما عدا النابين . وقد أكد اللص انه سيتجه لسماع (عبد المطلب) عوضا عن (عبد الوهاب).(اللي واده في داهية)
وقبل أن نبتعد عن عالم الفن نذكر القضية التي رفعتها جمعية (الحفاظ علي الوقار) علي الفنان (فريد الاطرش) بسبب أغنيته (يا أبو ضحكة جنان) خاصة قوله(أضحكها كمان وكمان وكمان) مما أعتبرته الجمعية (تلسين) عليها وتحدي سافر لمبادئها فهو لم يكتفي بضحكة واحدة بل يطلب ضحكة أخري وأخري .مما قد يؤدي لتلف عضلات فك حبيبه. وتلقت الجمعية ضربة قاصمة مع أنتشار أغنية الفنانة (حنان) (أضحك بقي و أفرجها ياعم)ومع فشل الجمعية في مجابهتها ترحمت الجمعيةعلي الزمن الجميل وأعلنت حلها وتسريح أعضائها بعيدان فل.
ويؤكد الدكتور (لوسفير) رئيس معهد الابحاث العلمية God only knows
ان التجهم والتكشير أثناء ابداء الرأي له عظيم الاثر في أعطاء الخطورة والاهمية لرايك . بعكس ان تقوله وانت مبتسم ومرح فهذا يؤكد ان رايك لا اهمية له والا كنت كشرت وانت تقوله .
فحين تنصح مدام (كلوديا موريس) مسئولة الاتيكيت في قصر الاليزيه انه من الانسب ان تكون متجهم وكئيب لان هذا يعطيك مظهرا وقورا بعكس ان تكون فاتح فمك كالحذاء المقطوع او كسيارة يعيدون شحن بطاريتها .
وقد تمني الكثيرون ان يكون الحديث الشريف المذكور فيه( ان ابتسامتك في وجه أخيك صدقة) ضعيفا ولكن للاسف . فحين يؤكد احد شيوخ الفتة وهو ايضا رئيس تحرير مجلة (هي ورزقها) ان من الجائز اذا رأيت احد المبتسمين فلا تتعجب فانها ارادة الله ويمكنك تقبيله ووضعه بجوار الحائط .
وينصح السيد (عماد المولي) الصحفي بجريدة (يا وارث مين يورثك) اللبنانية بأنه اذا أزمت معاك ولازم تضحك فالافضل لك ان تغلق فمك جيدا مع دفع الهواء عبر انفك مع اظهار الناب( وبالكتير قوي سنة كمان) فيما يسميه العامة والغوغاء والحثالة بالضحكة الصفراء . ويمكنك ايضا ان تلجاء بما يعرف بالضحكة الزرقاء او الضحكة السياسية وهنا الضحك ليس من طرافة الكلام ولكن لاستثارة من يخصه طرافة الحديث اذا كان موجود في نفس الجلسة . مع تأمين نفسك ضد اي حذاء موجه صوبك .
ويبدو ان العرب كانوا خارجين من (قعدة مزاج) مثل التي نراها في الافلام الدينية عندما قالوا (ان شر البلية ما يضحك) وهذا من الاخطاء الشائعة جدا لدرجة يصعب معها اصلاحها . فيجب عندما تأتيك الاحزان فلا تفوت الفرصة (و أدي الحزن والنكد حقه) واياك أن تضحك فقد أكدت الابحاث ان (الضحك من غير سبب قلة أدب ونقصان رباية) .
ومن أكثر الاشخاص سببا في ضيقي هو الكاتب (يوسف السباعي)لأن له مجموعة كثيرة من الصور وهو يضحك او عي الاقل يبتسم مما يعطي فكرة خاطئة للأجيال الجديدة في ان الحياة زمان كانت سهلة .
وكان يجب علي الكتاب و الشعراء بدلا من التغزل في ابتسامة وضحكة الحبيبة ان يتغزلوا في كأبتها ونكدها .فمثلا عندما يقابل الحبيب محبوبته وهي مكشرة يسارع ويقول: الله يا حبيتي علي تكشيرتك وتجاعيد (قورتك) وانت (ضربها بوز) وقرفانة . هي دي الجدية في بناء بيت محترم .عارفة يا حبيبتي لو كنت حضرتي مبتسمة كنت شككت في أنك تلعبين بي .
وأيضا توصلت قريحة الفيلسوف الشعبي عن خطورة الضحك الكثير الذي يعتبر علامة ألهية عن قرب وقوع كوارث . عندما قال بعد أي نوبة ضحك(خير اللهم أجعله خير) . وكأن الضحك هو الهدوء الذي تليه العاصفة .
وإذا لم يقنعك كل هذا فتذكر تلك الحكمة علي ورقة النتيجة بتاريخ 26/8/1993
والتي كانت تقول (من كثر ضحكه قلت هيبته). وقبل الختام يعتذر الكاتب أذا تسبب لا سمح الله لاسمح الله في أن تضحك أو تبتسم لا قدر الله.
وفي النهاية عزيزي القاريء اتمنى لك دوما التجهم والكأبة وان ينزع الله اي بسمة تتسلل الي قلبك وتحاول ان تلتصق (برخامة) علي وجهك .وأن يجعل حياتك كلها غم في غم وتذكر دوما أن(شر البليلة ما يؤكل) .
بقلم / كريم محمد السيد فراج

Saturday, 20 October 2007

هو كله حقيقة.. حقيقة ما فيش خيال؟

مستشفي الألسن للولادة

( فانتازيا ساخرة لواقعة حقيقية)
أهداء :...لأ.. نصيحة:الي الفتيات اللاتي يدرسن في الألسن لا تذهبن الي لجنة الأمتحان وأنتن حوامل أبتداء من الشهر الثالث وحتي شهر أغسطس
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
(صباح الخير يا أستاذ مٍسعد)
يرد عليها وهو يبتسم (صباح الخير يا مدام نجية ..عاملة أيه ؟ )
أجابته الحمد لله...ثم شرعا يسيرا صوب مبني كلية الألسن ذو الواجهة (البيج) المرعبة ...لن أتعجب إذا كانوا يمارسون فيه تجارة الرقيق ..لم تكن تعلم (نجية) لماذا تشعر بقعشريرة كلما أقتربت من هذا المبني ..قال (مسعد) وكأنما علم ما في عقلها : عارفة يا مدام نجية ..الشارع الصغير الفاصل بين كلية التجارة والألسن بيفكرني بأيه ؟
أجابته (نجية) :بأيه يا تري ؟ بالكوبري الفاصل بين الزمالك..والأهلـ.. أ..وبولاق؟
= بالظبط ..فكلية تجارة عاملة زي ما تكون مساكن شعبية وقلبوها كلية...فحين الألسن ..يا سلام تحس أنها كلية بتاعة ولاد الـ.. الناس..وبعدين أحسن حاجة في المراقبة هنا أنه مفيش لخبطة .
كانا قد وصلا الي المبني فشرعا يصعدا السلالم وهي تسأله :لخبطة أزاي يعني موش فاهمة؟
= مرة أيام ما كنت براقب في تجارة أدوني ظرف مكتوب عليه لجنة 4 قسم 12 بجوار شريط السكة الحديد..خدت الظرف وطلعت علي محطة مصر ماليقتش لا لجنة ولا طلبة ...وبعدين لم رجعت الكلية عرفت أنهم كان قصدهم اللجنة اللي في الملعب .
ضحكت (نجية) وقالت : لا..لا ..أطمن هنا مفيش لا لخبطة ولا مشاكل.
لم تكن تعرف ان المشاكل تأتي عندما تطمئن لعدم وجود واحدة .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تدخل (يسرا) لجنتها وبطنها منتفخة أمامها كعلامة أستفهام ..بسبب حملها..تجلس وتتسلم ورقة الأسئلة لمادة (تاريخ الأدب) من مراقب اللجنة (مٍسعد).. وتكتب بيانتها وتبداء في الحل و لكنها لا تعرف أجابة السؤال الأول ...ويمر الوقت وهي لا تزال تتأمل في جمال السؤال الأول ويمر بجوارها (مٍسعد) فيجد ورقتها بيضاء فيقول:أيه ده الورقة بيضا ..عشان ما حدش يغش منك ؟!
= (وهي تتأوه) لآ..أصلي تعبانة أوي و موش فاكرة أجابة السؤال الأول برغم أني مذاكرة كويييييييييييييييييييييييييس.
ــ أنا أقول لك علي حل كنت بأعمله لم أتعسر في الولادة..آ..الأجابة كنت بقعد أعصر في نفسي واتك عليها ..أعصر وأتك ..أعصر وأتك .
= هاه ؟ وبعدين .
ــ كنت بروح الحمام...قصدي كانت أجابة السؤال بتيجي.
= من مخك ؟
ـــ لآ ... من اللي حوليا .
تأخذ بنصيحته وتعصر في نفسها ..وتتك عيلها..تعصر وتتك ..تعصر وتتك...لحد ما جالها الطلـق... فنهضت تصرخ : ألحقوني هأولد .
يقول لها (مسعد): مفيش ولادة قبل نص الوقت.
تطلق صرخة عاتية فيتوتر الجميع ويندفع (مسعد) ليحضر (نجية) من اللجنة المجاورة ..فتسارع الي أخلاء ركن اللجنة و ترقد (يسرا) فيه و تحيطها بالكراسي وتغطيها بسترات بعض الطلبة وتهتف بـ(مسعد): أطلب الأسعاف بسرعة (وتلتفت الي يارا) وأنتي هاتي ماية سخنة بسرعة .
و(يارا) هذه من نوعية البنات (الفافي) ترتدي (بادي) متلاحم في بسالة مع جسدها وترتدي (بنطلون) أقل ما يوصف أنه (مرشوش عليها) بين تطل علينا أصابع قدميها في جورب كالقفاز متعدد الألوان (كل صباع لون) لتكتمل شخصية (البلياتشو).
تتألم (يسرا) وتقول:يا لهويييييييي ..يا خرابيييييييييييييييييييييي.
فتقول (نجية) وهي تجلس في مواجهتها تحسبا لأستقبال الجنين: انتي نسيت حاجة بعد يا لهويييييييي ويا خرابيييييييييييييييييييي. ناقص يا عرابييييييييييييييييييييي.
تنظر لها في غل وتقول : أنتي بتهزرييييييييييييييييييييييييييييي.
تبتسم (نجية) وتقول : لآ ..أبداً ..علي العموم أجيب لك بيضة مسلوقة عشان تحمي الطلق .
=لأ..أكتر من كده هأشييييييييييييييييييط..وهأولعععععععععععععععععععععععععع.
( أنا جيت بالحاجة السخنة) تقولها (يارا) وفي يدها كوب بلاستيكي صغير..فتتناوله منها (نجية) وتقول : أيه ده ؟؟! هو أحنا هنسلق بيضة ..(ثم تشم رائحته) وبعدين دي موش مية .
ــ ده نسكافيه ..أنا قلت أحسن من المية السخنة .
تجز (نجية) علي أسنانها وتقول :لا يا حبيبتي روحي هاتي حلة مية سخنة .
تذهب (يارا) للتنفيذ ..وتمسك (يسرا) وهي تتوجع بذراع (نجية) : مية سخنة لييييييييييه؟ هو هانعمل علي ال(بيبي) شوربــــــــــــــــــــــة.
ـــ معرفش بس تقريبا..علشان نغسله بعد ما ينزل ...لو نزل .
= تقريبا ؟! ليه هو أنتي موش متجوووووووووووووووووووزة ..
ــ أيوه بس لسه ما خلفتش .
تسألها أحدي الطالبات المحيطات بهما: وليه يا مدام (نجية)؟؟ العيب فيه.
ـــ العيب في المجتمع والناس.
كلهن في صوت (يا نهار أسود ..المجتمع والناس ..منه لله سمير الأسكندراني).
ــ لأ أنا قصدي المشكلة في الزيادة السكانية التي تلتهم كل خطوة نخطوها في النمو الأقتصادي...لذا قررنا أننا نتمتع شوية بحياتنا وبعد سنين طويلة نفكر في الأنجاب واللي أصلاً ساعتها هيكون فات أوانه طبيعي.وحتي لو حصل فيكفينا طفلين نخطـ..
تقاطعهم (يسرا) وهي تصرخ: انتم هتعملوا لي فيها أسال أستشير ركزوا معايااااااا .
تقول لها (يارا) التي أحضرت(ترمس) مية سخنة :ركزي أنتي وأفتكري نمرة جوزك ..نتصل بيه يجي يركز معاكي .
ـــ هو أنا متجوزة ؟؟(ثم بألم) أه متجوزة صحييييييح ..بس مووووش فاكرة نمرته .
(نجية) :ركزي شوية ..أعصري دماغك .
ــ أهههههههههههه أفتكرت .
= هاه النمرة كام ؟
ــ لآ ..أفتكرت أجابة السؤال الأول .
(يارا): سؤال أيه بس دلوقتي ..(ثم تلمح شيء أسفل (يسرا))أيه ده ؟؟
ثم تمد يده فتهتف (يسرا): أيه راس الجنين بانت.
ـــ لآ ..ده 1100.
= أيه دي الواد نازل بشاحن ؟؟!!
ـــ لأ ..دا الموبيل اللي كان ضايع من (يمني).
كانت شبه جالسة بجوراها فنشبت (يسرا) أسنانها في(...).فصرخت وجرت بعيداً.
ثم تطلق (يسرا) صرخة ألم أخري ..يسمعون بعدها ضجة من ناحية الباب حيث كان هناك الكثير من الشباب يريد الدخول و(مٍسعد) يحاول منعهم ويقول : يا جماعة موش كده ..تبقوا أتفرجوا علي الأعادة في الكاميرا في الملعب.
تعاود (نجية) النظر الي (يسرا) ثم تهتف :أهو الراس ظهرت أتجدعني بقي.
= أييييييييييه ..؟! هاتسحبيه من الراس؟!
ــ أمال هأدشها ..زي البصلة.
ثم تبداء (نجية) في سحبه واللهاث والعرق يغمرها هي و(يسرا) قبل أن يخرج الي النور...وتبداء في ضربه أسفل الظهر ليبكي فيتأكدوا من أنه علي قيد الحياة..فلا يستجيب ..فلا تجد (نجية) حل أخر سوي عضه فيبداء في البكاء..ثم تقوم بلفه في كراريس الأجابات و تناوله لـ(يسرا) وهي تقول :مبروك جالك ولد.
ــ عرفتي أزاي ؟! انه ولد...
= (وهي تنظر الي الأهتمام في أعين الفتيات من حولها) سهل قوي ..عنده ودنين .
ــ ودنين ؟! ليه هو فنجان ؟!
= ما هو حاجات زي دي لا تشرح هنا..علي العموم هتسميه أيه ؟
ـــ جزء من أسمه هيكون علي أسم مؤسس الكلية(رفاعي الطهطاوي) هأسميه (رفاعي الطهطاوي حسين ).
= نعم؟؟!! طب ولما تحبي تدلعيه .
ـــ هأقوله يا (حاج عبد اللطيف ميمي).
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ورسب جميع طلاب هذه اللجنة في (تاريخ الأدب) فيما فسر في وقتها علي أنه مؤامرة من الولايات المتحدة لتحديد النسل ومنع التكاثر .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بقلم /كريم محمد
القاهرة 31/5/2005

Saturday, 13 October 2007

كل عام وأنتم بخير




مـــصــر طالبة الطلاق


< عن وقائع حقيقية نتعمد نسيانها>
يقول لها في دهشة: أنتي نسيتي اللي حصل يوم 20فبراير 2002 ؟! ..غريبة بالرغم من انك عيطتي كتير ساعتها .
*****

10 يناير أحد المستشفيات الحكومية
تدخل الصحفية (نهال) غرفة (سليمان عاشور سلميان) في المستشفى .تجلس بجواره حتى تنتهي الممرضة من تغيير الأربطة المحيطة بمكان بتر ساقه .ثم تقول له : أزايك يا عم سلميان ؟ انا نهال شفيع . الصحفية اللي قالوا لك أنها عايزة تعمل حوار معاك .
يجاوبها (سليمان عاشور سليمان ) وهو يحاول الجلوس في سريره: حوار عن اللي حصل ؟
تقترب بمقعدها منه وتقول: ايوة يا عم سليمان .اللي حصل ليلة 4 يناير 2002.
يشرد بعينه وهو يقول: كان ليلة برد زي التلج..كانت.. تعرفي يا بنتي؟ انا مرتبي من سنين طويلة مية جنيه .
******
يقول المثل الصعيدي " اللي مايشبعش من لحمة العيد ..يفضل طول السنة جعان"
*****
الثلاثاء19 فبراير محطة مصر ليلاً الساعة 11:30
مع بدء تحرك القطار رقم (832) المتجه من القاهرة إلى أسوان .تدافع الجميع ليلحقوا ما تبقى من مليمترات فيه.المسافات البينية من كتل اللحم المتلاصقة تستخدم بكل الطرق . استعوض الناس ورق الكارتون والبطاطين بالنوافذ المحطمة لإتقاء الزمهرير الذي يصبه عليهم ليل يناير . والأبواب الفاصلة تحتاج إلى مقدرة غير عادية لفتحها . وفي حالة فتحها يفضل إغلاقها ثانية للهرب من (البلطجية) الذي يسيطرون على هذه المساحات الفاصلة . .الرحلة تستغرق 16 ساعة . القطار يتكون 14 عربة للركاب ,منها تسع عربات للدرجة الثالثة وخمس لركاب الدرجة الثانية ,بالإضافة إلى عربتين للعفش والقاطرة والجرار.كل عربة بها مقاعد تكفي 96 شخصا .وبسبب أنه اليوم السابق لعشية عيد الأضحى. فقد اتسعت المقاعد الثنائية لتكفي لثلاثة أو أربع أفراد.... اي إنه بحسبة بسيطة ..كان بالقطار عدد كبير من
الجوعى .
*********
تسجل ( نهال) في دفترها: سليمان عاشور سليمان .دائما ما كان يردد اسمه الثلاثي هذا.... لأنه لا يملك سواه .
******
" بس قبل ما أحكي لك...عايز اقولك اني دي مش اول حادثة تحصل في السيرك". يقولها ( سليمان عاشور سليمان) . وهو يقرب جهاز التسجيل من فمه.
فتسأله (نهال) :انا تقريبا سمعت عن حوادث كتير .
ـــ انا اكتر حادثة فاكرها كانت يوم 12 أكتوبر72 .فاكر اليوم بالظبط كأنه محفور في دماغي. المهم. الأسد سلطان هجم ساعته على محمد الحلو الله يرحمه. واللي خلاني فاكر برضه .أني كان في كاتب موجود وكتب عن اللي حصل.اسمه تقريبا (نجيب أدريس) أو ( يوسف الحكيم) حاجة زي كدة.
تضحك (نهال) وتقول: يعني أفتكرت اليوم والسنة ونسيت اسم الكاتب. كان اسمه (يوسف أدريس ) وكتب مقال اسمه (أنا سلطان قانون الوجود) .
ــ ممكن .
= انا اسمع أني عندكم في السيرك حوالي 25 اسد ونمر .فلما مش بتكفوهم لحم جاموس وبقر بتدبحوا حمير.
ــ أيوة فعلا .
= وأعرف ..تقريبا يعني..اني لحم الحمير به نسبة سكر .فلحمه بيكون أقرب للي لحم البني آدم. ومن كتر ما الأسد أو النمر يكله بيشتهي لحم الأنسان.
ــ يمكن هو ده السبب اللي خلى النمر (محسن ) يمد أيده من بين القضبان ويهبش رجلي. ويضطرو يبتروها زي ما انتي شايفة .
*******
20 فبراير الساعة الواحدة والربع ومن العربة رقم 11 . بدات النار الجائعة في إلتهام عربات القطار .شاكرة هيكله الحديدي الذي سجن من بين ضلوعه كل هذا اللحم .لا تفرق ما بين كبير وصغير .. ولا تلتفت إلى هؤلاء الذين يقفزون من العربات.. ليتهشموا على الطريق .أو يغرقوا في (ترعة الإبراهيمية ) .. بالرغم من كثرة العدد ولكنها لا تستغل حرية الإختيار . وتحاول أن تضيف التفحم كصفة مشتركة غير الجوع بين راكبي القطار.
وبعد 18 كم وعند منحنى ابو عمار رأى مساعد السائق الحريق.وبدأت رحلة إطفاء النيران .وكبى الجميع عندما شاهد منظر الأب والأبن المتفحمين .والأب يحاول تمرير طفله من بين القضبان .الصورة الذي كانت ستهز العالم بعد ذلك.لو سمح بنشرها .
من معلومات الحادث: التعرف على 195 جثة. وتثبيت رقم الضحايا عند الرقم (375) بقرار جازم وصارم .
ولكن المعلومة المؤكدة : أن الجوعى لن يشبعوا هذا العام ايضا
.

**********
تنتظر (نهال) حتى ينصرف آخر من حضروا للإطمنان على عم (سليمان عاشور سليمان) .قبل ان تبتسم وتقول: طيبين أوي المصريين دول.بعد أذنك بقى عشان ألحق أودي المقال .
يستوقفها ويقول: بصي يا بنتي أنا هاقولك على الحقيقة .مش عارف استريحت لك ليه؟ ..بس دي بيني وبينك .
تعاود الجلوس وتسأل : إتفقنا .
ينظر إلى السقف في حزن وهو يقول: اللي حصل ليلتها. أني كنت جعان أوي .أكتر من اي ليلة عديت عليا. أنتي عارفة أني البرد بيجوع.وجوع السنين بيذل...المهم..بعد ما وزعت لحمة الحمير على السود والنمور. قلت لنفسي أني مفيش مشكلة لو خدت حتة لحمة صغيرة كلتها.
تقاطعه في دهشة: لحمة حمير؟!! تاكل لحمة حمير ؟؟؟1!!!!
تعبر دمعة حواجز عيناه وهو يقول: انا يا بنتي لو جربت طعم الشبع مرة.كنت قرفت أني أكل لحمة حمير.
تمط شفتيها في اسى وتقول: أنا اسفة..كمل.
يهز كتفيه ويكمل: ولا حاجة ..حاولت اخد حتة لحمة ..قام محسن هجم عليا وعورني زي ما أنتي عرفتي... بس أنا اضطريت أقول انه هو اللي هبش رجلي من بين القضبان.. عشان ما يطردونيش من السيرك..اللي انا اصلا مش عارف إذا كان هيرضوا يشغلوني وأنا في حالتي دي ولا لأ.
تتجه للباب لتنصرف .وثم تستدير وتسأله: تشتغل تاني في السيرك؟ أنت مش خايف؟ طب هتتعامل ازاي مع النمر محسن مثلا؟انت مكرهتش الحيوانات؟
يبتسم في أسى ويقول: يا بنتي ..ماهو برضه كان جعان.

كريم فراج
31/1/2007






Friday, 5 October 2007

أحلامنا مش بعيد


06 يوليو, 2007

احلم..بالعقللللل
تعرفي كان بقالي كتير قوي مش بحلم-
ياه..معقول..وحلمت ايه بقي-
حلمت أفوز بالجايزة الأولي ف المسابقة-
بس-
وحلمت كمان كريم يفوز-
ها-
وباسم كمان-
طب وانا كمان والنبي-
كدة تبقي واسعة قوي-
الكلام دة دار بيني وبين
وليد امبارح، واكتشفنا اننا بنستخسر نحلم كتير، واننا لما بنحلم، بنمنطق حلمنا، ونطبق عليه قواعد الواقع الصارمة مع انهم بيقولوا "الحلم معليهوش جمرك"ومع ان حلمنا ممكن يوسع لحد ما يلم العالم كله..يبقي ليه نحلم ع القد
أنا فاكرة جملة عجبتني قوي -يمكن كانت الحاجة الحلوة الوحيدة-ف مسلسل محمود المصري، كان بيقول : انت عند آخر حلمك..لو بتحلم تكون موظف حتكون، وتقضي عمرك كله ورا مكتب حكومة..لو بتحلم بفلوس حتجيب، لو بتحلم تبقي تاجر حتبقي..أنا بقي،حلمي العالم كله..حلمي ألمس النجوم"..فليه احنا بنضيقها علي نفسنا..دة احنا حتي لما بنيجي ندعي، مش بنطلب الفردوس الأعلي، بنقول"يارب بس ان شاللا آقل حتة ف الجنة"..وأحيانا بنقول المهم مندخلش النار، مع انه دعاء..مع انه حلم
ف الحلم مفيش قواعد..ومفيش حدود..معقول تكون بدأنا نفكر حتي واحنا بنحلم!!..أنا بحلم بالدنيا بحالها
بحلم ليا ولاصحابي ولاخواتي وللبلد..بحلم حلم طويييييل وكبيييييير ووااااااااسع
يساع الدنيا والآخرة
وبحلم أفضل أحلم
وبحلم ييجي يوم أحقق أحلامي كووووولـ..احم..كلها دي واسعة قوي..يعني نقول..نصها!!..تلتها طيب



منقول عن مدونة بحلم .. بغني

هناء يعني

بالرغم من إنها كانت بتتكلم عن موضوع تاني

بس برضك



ألف مبارك يا عريس


وليد كسب يا رجالة


وعقبال بقية الديابة

الصورة اللي فوق للفريق سعد الشاذلي

مش بس عشان ذكرى حرب أكتوبر

لكن عشان نفتكر إن الأحلام ممكنة... للي يستحقها

Tuesday, 2 October 2007

فول بالزيت الحار


فقط أحتاجها الآن


إلي هذا البيت: الذي عاصرت فيه تجربة موت...بشر ...وشجر ...ومكان

كريم


ـــ المكان فايد ...بيت بجوار شريط السكة الحديد...عند اللوحة المكتوب عليها (34) ,البيت تحيط به حديقة صغيرة بها أشجار ليمون ومانجو (بالطبع نحن في الإسماعلية) ,البيت مكون من طابق واحد ,يعلوه سطح يستخدم استخدامًا صعيديًا صرف ..(عشة , فرن طيني) .
الزمان :وقت السحور .
يدخل (أنا) الي الحديقة وفي يده طبق الفول ,يعبر الحديقة,ويملاء رئتيه من نسيم الفجر المسالم , ويرسم في عينيه الأشجار المزدهرة ,والمانجو الذي ينتوي الأنتحار بالسقوط من علي شجره .
يدخل (أنا) إلي البيت ,الجميع مازال نائم .سيعد الطعام ,ثم يوقظهم ,وبالفعل دخل ووضع طبق الفول ..ثم صب عليه الكثير من الزيت الحار ...ثم عصر ليمونة كاملة لأن ابنه الأكبر يحب الليمون الكثير ...ولم ينسي بعد أن وضع الملح والشطة...أن يضع الكمون لأن أبنته دائما تقول : "الفول يحب الكمون" ....ثم وضع حزمة الجرجير تحت الصنبور قليلا ,ثم ضربه علي ظهر يده فتناثرت المياه . وكاد أن يخرج ولكنه تذكر أنه لم يضع الطحينة ففعل .
يدخل (أنا) غرفة الطعام ..ويرفع صوت الراديو قليلاً ...لينساب صوت عبد الباسط ...لتعبق سورة (مريم) الغرفة ..أفضل من عود بخور مغروس في القلب ." قالت يا ليتني مت قبل هذا وكنت نسياً منسياً "
يخرج الطبلية من تحت السرير ...وينادي زوجته....
يضع الفول علي الطبلية .... وينادي ابنه ....
يضع طبق الجرجير ... وايضا طبق الكنافة البلدي ... وينادي أبنته ......
لا أحد يرد .....
يدخل (أنا) كل الغرف ...وينادي ....لا .يجاوبه أحد....تنهيداته الحارة التي لا تستطيع الجدران أحتوائها ...فترتد أليه ....بالحقيقة التي يتناسها ....وينساها ..... أنها ..هو فقط...أنه أنا وليس نحن .
يخرج (أنا) من الغرف ...ليري طبق الفول لايوجد به سوي بعض حبات الفول التعسة...وعيدان جرجير خالية من الأوراق.
يخرج (أنا)..الي الحديقة ..ليراها علي حقيقتها... ..حقيقتها الصفراء...
يخرج (أنا) ليدرك انه يري شروق ...الخريف.....وحيدًا.

كريم فراج
أكتوبر 2005

Thursday, 27 September 2007

كنافة وقطايف


الموضة الحالية هي إنكار نظرية المؤامرة وتسفيه من يقول بها، واتهامه بالبارانويا وكذلك بتخلف التفكير، لأننا تجاوزنا تلك المرحلة، كأن المؤامرات كانت تحاك قديما ثم انتهت الآن.

نبدأ من رمضان وبه ننتهي.

ربما كلنا يحفظ من أيام الدراسة أن رمضان هو شهر الفتوح الإسلامية الكبرى من أول غزوة بدر وحتى عين جالوت..
ربما بعضنا يعرف متى ابتدأت العادات-المصرية- في رمضان.. بالضبط.. أيام الدولة الفاطمية.. نكمل المعلومة.. ولماذا؟ من أجل إلهاء الناس.. نكمل الاستفسار.. إلهائهم عن ماذا؟
هذا هو مربط الفرس
يمكننا العودة لكتاب صغير وقيم لـ أ/جمال بدوي اسمه "الفاطمية دولة التفاريح والتباريح" يقرر فيه من البداية أن الدولة الفاطمية لم تكن دولة دراويش و إلا لما استطاعت بسط سلطانها على كل تلك المساحة الواسعة لمدة قرنين، ولكن في تعاملها مع الشعب المصري كان عليها أن تستخدم أساليب التخدير والتقرب من الشعب شيئا فشيئا بالخروج بالاحتفالات الدينية من المسجد والبيت بمظاهرها البسيطة التي درج عليها المصريون للشارع، واختراع نوع من الحلوى لكل مناسبة (القطايف والكنافة والخشاف والعاشورة) وأشكال الاحتفال من مواكب وفوانيس. كي تخفي حقيقة بعدها المذهبي الشيعي الإسماعيلي الباطني عن مذهب المصريين السني، وبالتدريج تبدأ في نشر دعاتها ودعواها سرا حتى تصل لمرحلة الحاكم بأمر الله الذي ادعى الألوهية. وهو لم يصل لتلك الدرجة من فراغ، بل عبر جهاز إعلامي دعوي جبار استطاع انتزاع مؤيدين له من بين سواد الشعب المصري، على الرغم من إنكار المصريين الطبيعي لتلك الدعاوى المتطرفة.

ثم انقضت أيام تلك الدولة بمقدم صلاح الدين لمصر وبدأه الدولة الأيوبية.

ثم انقضت أيام صلاح الدين ومن تبعوه وبقيت الكنافة والقطايف.

ثم أتي التليفزيون وأنتم تعرفون ماذا صنع التليفزيون.. من نافلة القول أن نكرر للمرة المليون أن المسئولين عن هذا الجهاز استطاعوا أن يفعلوا ما لم يستطع الشيطان فعله في أحد عشر شهرا، فبقدرة قادر تحول شهر رمضان من شهر الصيام.. شهر القيام.. شهر القرآن لشهر فوازير رمضان.. شهر مسلسلات رمضان.. شهر برامج رمضان حيث يحتفى بالنجوم والنجمات من الممثلين والراقصات على طول الشهر الذي أهناه فهنا.

السؤال الذي أوجهه لنفسي:

وما الجديد في ذلك؟
نحن نعرف ذلك.
بل وأكثر من ذلك فإذا فكرت في الموضوع بشكل اقتصادي بعيد عن الدين، ستجد أننا نقلل العمل في ذلك الشهر لأقل حد ممكن بحيث نكاد لا ننتج، ونزيد الاستهلاك بشكل لا يصدق.. وكل ذلك بمباركة الحكومة.. طب ليه؟ معقول اللي بتفكر فيه؟!! استغفر الله العظيم
قول كلام تاني.. مش معقول.. مش مصدق

يعني قصدك إن الحكومة قصدها.... لا لا يا راجل قول كلام غير ده.. بص هي مش قصدها هي بس مش واخدة بالها.. أنت عارف الحاجات دي بتحصل

فأرد على نفسي.. لو مش قاصدة
فدي تبقى مصيبة.. أما لو قاصدة
فالمصيبة أعظم

أفترض معاك إنها مش قاصدة

طب بص معايا على شوية الحاجات دي
وأنا بتصفح في المصري اليوم لقيت مقالة في سلسة مقالات عن التعليم.. الصحفي حاسس إنه بيدن في مالطة.. التعليم يا أخونا.. يا أخونا التعليم.. المستقبل يا أخونا.. من غير تعليم كويس دلوقت، قول مع السلامة لبكرة.. يا أخونا إسرائيل بتصرف أربعين ألف دولار على الطالب الجامعي في السنة وأحنا بنصرف ثمانية آلاف جنيه بس.. مافيش مجال للمقارنة..

أكمل أنا.. يا أخونا المناهج متخلفة.. يا أخونا النظام كله غلط من الأول لأنه قايم على الحفظ.. يا أخونا النظام الأمني اللي قايمة عليه الجامعات مش هيطلع مفكرين يا إما هيطلع موظفين.. بصمجية، أو متطرفين ما يعرفوش احترام الآخر، لأن الاخر مجاش في يوم واحترمه وإداله فرصة يتكلم.. يا أخونا المعيدين ولاد الدكاترة اللي بيتعينو بأسلوب التوريث وبيتجاهلو المستحقين الحقيقين هيدمر التعليم في المستقبل. المستحق اللي بجد هيسافر بره ومش هيعتبها تاني، وابن الباشا هيفضل ابن باشا ومشتري دماغه ما هو خدها بلاش.. وفي الأصل هو مش قدها، يعني أنت بتدمر في بنية تحتية صعب قوي إنك تبنيها تاني.. تآخد أجيال وناس تسافر بره وتتعلم من الأول زي ما ابتدى التعليم العالي في مصر، بمعنى آخر الناس بتتحرك قدام وأنت بتمشي ورا.

أنت جيت على سيرة البنية التحتية.
طب خش علىبيع مصر حتة حتة.. جملة وقطاعي.. مصانع.. شغال.. بنوك.. شغال.. مؤسسات زي التأمين الصحي.. شغال.. آراضي في مواقع حيوية زي القلعة والتحرير.. كله شغال وكله بتراب الفلوس.. قرب.. قرب.. قرب
وبعدين يا معلم؟
ماتقلقش كله معمول حسابه والفلوس دي هيتعمل بيها حاجات كبيرة هتعدل الموازنة وتنعنش الاقتصاد والمستثمرين الجدد مش هيمشو العمال، بالعكس دول هيعينو ناس جديدة ويحلو أزمة البطالة وأزمة حسني عبد ربه وكله هينتعش
وبعدين يا معلم بقالنا فوق العشر سنين في السكة دي والحالة مش بتنتعش، لا الموازنة اتعدلت ولا الاقتصاد اتصلح؟
وبعدين يا معلم ده الحكومة دلوقت بتقولها وش للشباب انتو اتعلمتو غلط وكل واحد يشيل نفسه، وأنا مش مسئولة عن الغلطة دي، شوفو حد غيري ترمو بلاكو عليه، روح ياد منك له بالبكالوريوس والأسنس اللي خده يشتغل عتال ولا شيال.
لأ والأكادة واللي يغيظ إنها لسه عايزة تشتغلنا وتفهمنا إن كده في يوم من الأيام هتبقى حاجة، ما خلاص يا حاجة الفضيحة اتعرفت، واللي معاه شهادة يخبيها أحسن ويرضي بمليمين في أي شغلانة.

وبعدين يا معلم ده أحنا بعنا الأصول. الجيل اللي طالع حتى مش
هيلاقي حاجة يبيعها.


ده أحنا بعنا المستقبل وخسرنا الحاضر.

نعمل إيه يا معلم؟

أمسك بواحدة قطايف تانية مشبعة بالعسل ومحشوة بالسوداني والفزدق واللزدق. أنظر للتلفزيون بعين نصف ناعسة من تأثير الأكل.

ثم أجيب

بص هو غريب جدا موقف المفتي.. يعني زمان أيام لما كان أستاذ أصول فقه كان طلع في برنامج"الكلام الطيب" على دريم وقال إن الختان مكرمة قد تصل للسنية وده حسب مذهبه الشافعي.. ودلوقت اكتشف إنه حرام..

بس برضك أقولك الأهلي مالوش حق يعني ما يسيب حسني عبد ربه للإسماعيلي، يعني مش يبقى مخلص على اللعيبة بره وجوه

بس الأهلي يستاهل كل الدعم منا ده هيوصل اليابان للمرة التالتة وكده هيبقى الفريق الوحيد اللي عملها

شفت الكليب الجديد بتاع هيفاء.. لسه.. طب خليه لبعد رمضان.. ده الزعيم عادل إمام بيقول دي أجمل ست في الدنيا

بتقول إيه؟ هيضربو سوريا وإيران، وأحنا مالنا يا أخي ما هما اللي غلطانين مش عارفين حجمهم.. الحمد لله إحنا حكماء ومبنزعلش حد

بتقول إيه؟ أكلت يوم أكل الثور الأسود

مين الثور الأسود ده؟

بتقول إيه؟ يوم ما هيهاجمونا هنكون لوحدنا زي ما سيبنا التانيين. وعضمنا كل شوية عمال يخوخ من جوه لحد ما يقع لوحده أو بأقل ضربة.
يا عم فال الله ولا فالك. ده حتى كفاية علينا الصديق الأمريكي والشريك الإسرائيلي


بتقول إيه؟ كل النقط اللي فاتت دي مترابطة ومقصودة ومينفعش تكون عشوائية عشان قانون الصدفة نفسه بيحتم كده.

يا عمي سيبك بقى من فكر نظرية المؤامرة المتخلف ده.. ده حتى بيعايرو بيه العرب دلوقت

بص خد حتة الكنافة دي

إيه.. مش بقيت أحسن دلوقت؟






Tuesday, 25 September 2007

مع السلامة


افتح الشباك الآن. انظر.. هل ترى القمر؟
إذا كنت لا تراه من موقعك هذا أرجو أن تنزل الشارع.
الموضوع ليس بهذه الصعوبة كما تظن. فقط اترك الكمبيوتر.. التليفزيون.. أي شيء، بالتأكيد بعد أن تنهي القراءة.
تخيل أنت في الشارع تبحث عن القمر، الذي هو بدرا الليلة حيث هي ليلة الرابع عشر من رمضان.
ابدأ بالتفكير
لقد انتهى الشهر
هذه هي الحقيقة.. ماذا فعلت في النصف الأول؟

هذا سؤال أوجهه لنفسي قبلك فأجدني مقصرا. لم التزم بصلاة التراويح كما اعتزمت، ولم يكن ذلك دائما بسبب العمل.
أجدني مقصرا في قراءة القرآن والتفاسير، في الاستغفار.. الوقت يمر.. ما الحل؟
ليس هناك سوى إعادة النية بالالتزام بما بقي في الشهر، ولكن
هل صارت عزيمتنا ضعيفة إلى هذا الحد؟
وكم مرة نحتاج إلى إعادة النية كي نكمل الشهر؟
وكم يلزم من الوقت كي نضيعه في الخطأ والعودة؟

الوقت يمر ولن يعود

أقول أن المشكلة قد بدأت قديما، من قبل رمضان. حيث لم نحسن الاستعداد له في الشهور التي سبقته.
بالضبط كما يحدث معي مع التليفزيون، فعلاقتي شبه مقطوعة به خلال العام فلا أجد مشكلة في تركه خلال رمضان مهما قدم فيه من إغراءات.
الافطار عندي على صوت إذاعة القرآن الكريم شيء تقليدي، الاستماع لبرنامج "حقائق وشبهات" لـ د/محمد عمارة بعد آذان المغرب يفوق متعة أي برنامج ترفيهي.
ولكن هذا أنا العادي ما هو الجديد الذي قدمته لهذا الشهر؟
أليس من المفروض أن تكون قمة عبادتي وطاعتي في هذا الشهر؟

انظر معي للقمر الليلة
إنه بدر
وهو لم يصل لهذه المرحلة في يوم واحد. وهو لن يظل على هذه الحال للأبد
فابدأ اليوم علك تصل لكمالك قبل انتهاء الشهر

Saturday, 22 September 2007

طريقنا الخطأ


بمناسبة عودة الشاعر الذي سرقت منه عنوان المدونة




ما بيضحكش الواد الواقف

عند بتاع الفاكهه

ما بيضحكش

ما بيضحكش..

عِنيه دي فراشه

رايحة و جايّة

على شباكها

و ما بيضحكش


طلِّت هيَّ

رفعت رِمش

و سابت رمش

نصبِت فوق الضحكة… إشارة

شدِّت فوق الليلة ستارة

و نامِتْ

لَكنْ هوَّ الواد الواقف

عند بتاع الفاكهه

لسّه منامش

و ما بيضحكش

.. ما بيضحكش الواد الواقف

عند بتاع الفاكهه

حتى بتاع الفاكهه

طفَّى كلوبُّه

و طّى الراديو..عشان بيوِّش

شدّ البالطو

شد الكحة

و شد البرد

و شد سجارتُه

و نام

لكن..لسّه الواد الواقف جنبه منامش

و ما بيضحكش

ما بيضحكش الواد الواقف

عند بتاع الفاكهه

حتى القهوة

قالت كِش

ف وش.. ملوك الليل

عواجيز و سهَارَى

حتى الحارة

واربِت بابها

و ساوِت بين حُفَرَها و ترابها

مسحت كل رسوم الحَجْلة

و كل خطوط النَكش

و سندت راسها ما بين حيطتين

بين يملك..و ما يملكش

و هوَّ ..الواد الواقف

عند بتاع الفاكهه

ما بيضحكش

..

لسه الواد الواقف

واقف

ما بيمشيش

شايف..حد قصاده في البلكونه

و خايف

يطلع هاجِس ضلمه

خيال للشيش

تعِب الواد

بص يمين و شمال

و ضِحِك

لكن هيَّ .. البنت الواقفة ف نص أوضتها

ما بتضحكش

..

و ما بيضحكش

…



خالد  عبد القادر

حمد لله على السلامة يا خالد

طبعا اللوحة اللي فوق للفنان العبقري فان جوخ








Thursday, 20 September 2007

وآدي واحد فهم


إعدام الفئة الضالة

بقلم مجدى الجلاد

١٦/٩/٢٠٠٧
أعلم أن لله في كل أمر حكمة.. لذا فلم أستغرب صدور حكم قضائي في أول أيام رمضان بحبس ٤ رؤساء تحرير، بتهمة إهانة رموز الحزب الوطني.. فالثابت أن لهذا الحزب بركات وكرامات.. كما أن الله ينصر دائماً المؤمنين من عباده.. والحزب الوطني علي رأس هؤلاء المؤمنين.. لذلك قيض رب العرش العظيم لهذا الحزب المؤمن قاضياً مؤمناً وعادلاً، اقتص له من الفئة الضالة: عادل حمودة، وائل الإبراشي، عبدالحليم قنديل، وإبراهيم عيسي.
يستحق هؤلاء الصحفيون هذا الحكم القضائي، رغم الرأفة والرحمة التي شملتهم بها المحكمة.. إذ كان لزاماً علي القاضي أن يحمي الأرض من الفساد والإفساد، وأن يقطع دابر الذين كفروا بالحزب الوطني ورموزه.. ولكن الرجل كان رحيماً بالصحفيين إلي حد التفريط، وجائراً علي الحزب الحاكم إلي درجة العداء.. ولكنه وضع دستوراً جديداً للصحافة ونظام الحكم في خطبة سياسية بليغة، مفادها «لا أحد منكم أيها الضالون يعرف قيمة الحزب الوطني ودوره في البلد، ومكانته وتضحياته من أجلكم».
أنا يا سيادة القاضي أعرف قيمة وتضحيات الحزب الوطني الديمقراطي الموقر والمحترم.. أنا بريء مما اقترفه عادل حمودة ورفاقه من الفئة الضالة.. الشرذمة المتآمرة.. وعناصر الخيانة والعمالة، التي تهدف إلي تكدير الأمن العام والخاص، وإلحاق الضرر بالاقتصاد الوطني والمنتخب الوطني.. وتهديد السلام الاجتماعي والفلسفي.. أنا مع الشرعية والصحف القومية التي تعرف - وحدها - مصلحة البلد.. وطبعاً لا مصلحة إلا مع الحزب الوطني.. وأي «محظورة - محصورة - محفورة»، هنخرب بيتها.. وأي صحافة لا تسجد للحزب الوطني تبقي بتاعة «المحظورة».. وأي صحافة لا تعمل مع الأمن تبقي بتمويل من «المحصورة»!
بصراحة.. زودها عادل حمودة ووائل الإبراشي وإبراهيم عيسي وعبدالحليم قنديل.. كان لازم تقطع المحكمة أيديهم من خلاف.. وكمان فين «الخوازيق».. اختفت فجأة من مصر.. شخصياً أقترح أن يوضع الأربعة علي «خوازيق» في ميدان التحرير.. وأرجو من رجال الحزب الوطني مراعاة المقاسات.. إذ إن تكنولوجيا الخوازيق تحتاج إلي لياقة في الاستخدام، لاسيما إذا كانت «الخوزقة» لمجرمي الصحافة المستقلة.. وكمان فين كلاب «صلاح نصر» المدربة علي حاجات جميلة.. أعتقد أن إهانة رموز الحزب الوطني جريمة لا تغسلها ولا تمحوها إلا هذه الكلاب.. وبعدها خلي راجل من بتوع الصحافة المستقلة، يكتب كلمة واحدة ضد الوحدة المحلية في «مطوبس» مش الحزب الوطني.
إنتم فين من الحزب الوطني يا سفلة.. تعرفوا إيه عن الحزب الوطني.. هوه أنا عندي غير الحزب الوطني.. هوه أنا خلفت غير الحزب الوطني.. يا ريت العالم كله يكون حزب وطني.. «تتشل إيدك» يا عادل يا حمودة.. إزاي تهاجم «صحابة جمال مبارك».. ألا تعرف أن من يهاجم أحمد عز وعلي الدين هلال مصيره جهنم وبئس المصير.. قطع لسانك يا وائل يا إبراشي.. ألا تعلم أن جمال مبارك ضحي بحياته وشبابه من أجل مصر.. وأن أحمد عز ترك ماله وتجارته ليخدم البلد، فأصبح علي «الحديدة»، وأن علي الدين هلال ودع العلم والطلبة والبحث العلمي من أجل انتخابات القواعد والقوائم والجوانب في الحزب الوطني.
بصراحة.. سوف أغامر لأول مرة في حياتي، وأعلق علي حكم قضائي، رغم علمي بأن ذلك قد يعرضني لعقوبة قانونية.. ولكن كلمة الحق أبت أن تظل حبيسة بداخلي: إن القاضي الذي أصدر الحكم بحبس رؤساء التحرير الأربعة سنة واحدة، أفرط في استخدام الرأفة، وما كان له أن يفعل ذلك، لأن العقوبة ليست رادعة لصحافة الشر والخبث والخيانة.. لذا أدعو النظام الحاكم لإعدام الفئة الضالة في الصحف المستقلة، حتي يتمكن الحزب الوطني من مواصلة مشواره في بناء مصر الحديثة
.